dalawang beses pa lang ang alam kong pagkakataon na naitampok sa national tv ang opisina namin. isa ay sa imbestigador, tungkol ito sa dalawang dating empleyado sa aming pabrika na nangarap maging artista. may pelikula na nga sila eh at matagal na itong showing sa quiapo at baclaran. title: lucena scandal.

pangalawang beses na napasatelebisyon ang opisina namin ay nitong nakaraang sabado lang.

ganito nangyari non. 10th anniversary ng cml philippines kaya naman may libreng pakain para sa lahat ng pumasok ng friday last week. masarap ang mga handa, may chicken bbq, fried fish, steamed gulay, kare-kare, at ubod ng sarap na seafoods na paborito ng lahat. oo nga pala, may cake din na malaki.

fast forward tayo.

madaling araw ng sabado nagtext si kaopisina A kay kaopisina B na hindi daw siya makakapasok dahil humihilab ang tiyan niya. reply ni kaopisina B kay kaopisina A humihilab din ang tiyan niya. kasabay ng pagtetextmate ni kaopisina A at B sa isa't isa ay kulang kulang isang libong tao rin pala ang nakaupo sa inidoro at nagpapaalam na hindi daw sila makakapasok kinabukasan dahil nagtatae sila.

sabado, dumating na ang gma7 sa dlsumc para sa pag-interview ng mga biktima food poisoning na naka-confine sa nasabing ospital. kaya ayon, sikat nanaman kami.

may karamihan din ang nabiktima. 76 na na-confine ng ilang araw sa ospital. 256 ang idinala sa ospital, in-injection-an, pinainom ng gamot, at pinauwi. mahigit sa 600 din ang pumunta sa opisina para humingi ng gamot sa clinic. hindi pa kasama sa bilang yung mga hindi humingi ng gamot at yung inimbitahang mga folk singer na nakita kong naglagay sangkatutak na tahong sa plato.

ang tanging mga hindi tinamaan ng poisoning ay yung mga absent, restday, mga panggabi, mga naubusan ng pagkain at yung mga maarte sa ulam... kagaya ko.