pagkain

medyo naging conscious na ko nitong nakalipas na taon. naging regular na kumain ng gulay. dati kasi kumakain lang ako ng gulay kung wala na talagang ibang ulam. ngayon basta may nakahain kumukuha ako. medyo mapili pa rin ako, hindi mo pa rin ako mapapakain ng ampalaya pero natutunan ko na mahalin ang sibuyas at kamatis na dating mortal enemy ko.




luho

"bibilihin ko kung ano gusto ko" yan ang naging motto ko nung 2005 bday ko kaya naman nitong 2006 talagang hindi ko tinipid sarili ko. sinabi ko kasi sa sarili na pagbigyan ko naman ang lahat ng luho ko sa loob ng isang taon, habang kaya ko pa. malay mo kasi pagtagal tagal hindi na dumating sa kin yung pagkakataon na ipatikim ko sa sarili ang mga pinapangarap ko lang dati.

ilan sa mga napagpuntahan ng pera ko last year ay ang playstation2, bagong cpu para sa computer, dalawang telepono, tatlong sapatos, isang katutak na damit, mp3 player at dvd player. sama mo na rin pala ang koleksyon ko ng cd na nadadagdagan ng isang piraso bawat linggo.

this year ititigil ko na muna ang pagiging maluho at itutuon ko ang mga gastos ko sa mas makabuluhang mga bagay.




ispiritwal

kung bihira ako magdasal dati ngayon medyo nagimprove na. nagdadasal lang kase ako kapag nagpapasalamat, pero kung may kailangan ako hindi. sa kin kase kung may gusto ako o pag may kelangan ako paghihirapan ko yon, saka na lang ako magpapasalamat pag nakuha ko na. napakarami nga naman palang dapat pasalamatan kaya naman medyo nadagdagan ang oras ko sa Diyos.

simula nobyembre pala nagsimula na rin akong magsimba tuwing tanghali ng wednesday. gagawin kong ituloy tuloy ang bagay na iyon.

guilty ako na minsan hindi ako nakikinig sa sermon, pero ayos lang naman siguro yun. yung patingin tingin ko sa kawalan kase rare moment of reflecti0n yon. maiitindihan naman na ko ni Lord dun.




kalusugan

salamat at nabawasan ko na rin ang pagkonsumo ko ng alkohol. madali lang naman pala ikontrol. hindi kinakailangan ng special talent ang pagiwas sa alak.

ang hindi ko pa naso-solve hanggang ngayon ay yung pagkalulong ko sa puyat. ewan ko ba kung anong naguudyok sa kin na huwag humiga sa kama hangga't hindi pa lumalampas sa alas dose ng hating gabi ang relo.




kabuhayan

malaking papasalamat ko sa taong ito dahil sa tatlong taon ko ng pagta-trabaho nitong 2006 lang ako naregular. masaya ako sa ginagawa ko at kuntento ako sa natatanggap kong sweldo.

oo nga pala, first time ko lang makatanggap ng 13th at 14th month pay. ganun pala kasarap yon, dadaan lang na parang biglang nawala. pero ayos lang yon, masaya naman ako eh.




pamilya

2006, mas pinagbibigyan ko na ang pamilya ko kesa sa mga kaibigan. resolusyon ko yan nun 2005 at natupad ko naman.

mas maraming beses ako na lumalabas kasama si erpats at ermats. minsan ako nanglilibre, minsan sila. minsan kape, minsan beer. minsan naman lalakad lakad lang kasama ang window shopping.

nitong nakaraang buwan nga pala nanood kami ng "happy feet". sa sinehan, nasa kaliwa ko nakaupo si erpats, sa kanan naman si ermats. ako sa gitna, may hawak ng popcorn. huling nangyari yung ganun 1994 pa, nung nanood kami ng lion king.

matagal ko nang sinabi sa sarili ko na alaala na lang ng kabataan ang ganong bagay pero nangyari ulit. wala nga namang imposible ano?




kaibigan

marami akong nawalang kaibigan nitong nakalipas na taon. yung mga parati kong kausap dati hindi ko na magiging kasing close katulad ng dati. wala namang mga away na nangyari, natural naman kase na magkaron ng iba ibang interes na ang bawat isa senyo. kasabay nito ang paghihiwalay ng landas.

may mga iba akong kakilala na sinubukan kong panatilihin ang pagkakaibigan sa pagitan namin pero mas pinili nilang wag gawin ang sinusubukan ko. sa mga taong ganon wala na kong magagawa.

sa kabila naman nito may mga bagong kaibigan rin akong nakilala, yung iba hindi ko pa aakalain na magiging kaibigan ko.

isa lang ang sigurado ako, sa nakalipas na taon nakilala ko kung sino ang mga tunay kong kaibigan. malungkot nga lang don karamihan sa kanila wala sa pilipinas.




palakasan

kolelat ako nitong 2006. kung nung 2003 most improved player ako sa basketball, 2004 nasa mythical team, at 2005 nakasama sa champion team. last year wala man lang akong award na nakuha. sore loser ako hahaha.

dibale na may bagong sport naman akong pinagkakaabalahan, badminton.




maka-bayan

nasimulan ko na ang pagtangkilik ko sa lokal na produkto. kung dati sa adidas, nike, converse, guess, girbaud, at mossimo lang umiikot ang pinagpipilian ko ng damit, ngayon mas pinupuntahan ko na ang happy days, branded, at artwork. bukod sa mas tipid, mas natitripan ko na ang uri ng mga damit nila.

mas natutuon na rin ang atensyon ko sa lokal na sining. muli kong nasubukan nitong taon na to pumasok sa sinehan para manood ng tagalog na pelikula. kung hindi ako nagkakamali, isinama ko ang isa kong kaibigan para manood ng "nasaan si francis".

sa musika, obvious naman. mas preferred ko ang local kesa sa foreign. masama nga ako minsan kase pinapatulan ko yung mga taong may mentality na automatic na mas magaling ang foreign kesa local.

lately rin pala, na-facinate sa mga bagay na nagmula sa bansa natin. naa-appreciate ko na ang ethnic music at mga katutubong produkto. balak ko nga this year na gawing project ang pag-transform sa kwarto ko na filipino inspired ang tema.




kung titingnan ang lahat hindi ganun kasama ang nakalipas na taon sa kin. naging mabuti pa ito sa kin, sana ganon din ang 2007.